Кожуф и натаму е активен на трансфер пазарот со тоа што тимот од Гевгелија договори две нови засилувања, станува збор за млади и талентирани играчи – Филип Дамевски и Михаил Танчев.
Дамевски е 18-годишен фудбалер кој доаѓа од младинските категории на Вардар, има настапувано и за младинскиот тим на Скопје, а во дресот на Вардар беше играч со најголема минутажа на фудбалскиот терен. Во есенскиот дел на сезона 2023/2024 тој ги одигра сите 990 минути за тимот на Вардар и се најде на врвот од листата на играчи со најголема минутажа.
Дамевски ќе биде одлично засилување и освежување во редовите на Кожуф, кој сега го води штипскиот стратег Иван Варадиновски.
Танчев кој игра како централен напаѓач има 18 години, а во Гевгелија доаѓа од Раднички Ниш, каде го помина пролетниот дел од минатата сезона. Танчев десет години беше дел од академијата на Вардар, настапувајќи за младинските категории на најтрофејниот македонски фудбалски клуб, а потоа стекна и меѓународно искуство настапувајќи за Раднички од Ниш.
Овие две засилувања го надополнуваат ростерот на Кожуф.
Новата сезона екипата на Кожуф ја отвара во Штип против Брегалница, а првото коло се игра на 23 август.
