Со цел промоција и унапредување на женскиот фудбал во Општина Куманово, под покровителство на Општината и ОФС Куманово, ЖФК Речица го организира традиционалниот турнир во женски фудбал „ЖФК Речица 2012 – 2025“.
Турнирот ќе се одржи на 9 и 10 август на стадионот во село Речица, Куманово.
Учесници на турнирот ќе бидат домаќинот ЖФК Речица, поранешниот шампион ЖФК Каменица Саса, актуелниот шампион ЖФК Љуботен од Тетово, како и српскиот гигант ЖФК Машинац од Ниш, кој е најтрофеен клуб во Србија.
Натпреварите ќе се играат под рефлектори. Во сабота (9 август), првиот натпревар започнува во 18:00 часот, а вториот од 20:00 часот. Во недела (10 август), натпреварот за трето место ќе започне во 17:30 часот, додека финалето е закажано за 19:30 часот.
Сите мечеви, освен финалето, ќе се играат по 2×40 минути. Финалниот дуел ќе се игра стандардно – 2×45 минути. Во случај на нерешен резултат, ќе се изведуваат пенали без продолженија.
Организаторот предвидува и поединечни и екипни награди – пехари за прво, второ, трето и четврто место, како и награди за најдобар играч, најдобар стрелец, најдобар голман и најдобар млад играч.
ЖФК Речица е клуб што настапува во Првата женска фудбалска лига и располага со сопствен модерен спортски комплекс – фудбалски терен со голема трибина, покриена трибина, рефлектори за вечерни натпревари, гардероби, теретана, како и капацитети за сместување на играчи.
Спортска Мрежа наскоро ќе реализира специјална емисија посветена на спортскиот комплекс и на ЖФК Речица, со цел подетално да го прикаже развојот на клубот и инфраструктурата која го издвојува на домашната сцена.
