Екипата на Фенербахче покажа апсолутна надмоќ и безмилосна игра во големото финале на турнирот во мал фудбал Црнилиште Куп 2025, освојувајќи ја титулата на импресивен начин.
Во финалниот натпревар одигран вечерва, Фенербахче ја декласираше екипата на Роденденски Пињати со убедливи 4-0, демонстрирајќи моќ, контрола и врвен квалитет од првата до последната минута. Пињати влегоа со надежи, но беа целосно надиграни од супериорниот состав на Фенербахче, кој не им остави ниту промил шанса за изненадување.
Тимот на Фенербахче доминираше низ целиот турнир, оставајќи зад себе силни противници и покажувајќи дека оваа година титулата им припаѓа со целосно заслужена игра.
Технички прецизни, тактички зрели и физички подготвени – ова беше турнир во кој немаа конкуренција.
Пред финалето, беше одигран и натпреварот за третото место, каде Ozan Ajaz со победа од 2-0 над Zgjimi Kompani го обезбеди бронзениот пиедестал и заврши турнирот со чест и добар настап.
Црнилиште Куп 2025 заврши со спектакуларна вечер, исполнета со емоции, навивачи и футсал за паметење. Турнирот и оваа година го потврди своето место како едно од најголемите спортски случувања во регионот.
