Екипата на Беса денес со 0:2 го загуби баражот за опстанок во Прва лига од екипата на Башкими, а веднаш после натпреварот клубот излезе со соопштение во кое се вели дека клубот нема да продолжи со натпреварување во Втора лига.
Како што е наведено во соопштението клубот ќе се посвети на академијата, а сениорскиот тим нема да продолжи со натпреварување, односно Беса нема да биде дел од Втората лига за следната сезона.
„Сопствениците на клубот Беса 1976 ја известуваат јавноста за повлекување од раководењето со првиот тим. Академијата останува единствен фокус! По долг период на ангажман, посветеност и жртва за нашиот клуб од срце, донесена е одлука дека од денес екипата нема да се натпреварува ниту во Втората лига на РСМ. Фокусот ќе биде целосно насочен кон академијата. Им се заблагодаруваме на сите фудбалери и тренери. Во овој момент на разделба, чувствуваме должност и желба од срце да им се заблагодариме на сите навивачи кои нè поддржувале – и во добро и во лошо – на секој фудбалер што ја носел нашата маичка, на тренерите и техничкиот штаб, соработниците, спонзорите и секој поединец што дал најмал или најголем придонес во нашиот пат“, се вели во соопштението на Беса.
Ова се отвара уште едно прашање, дали воопшто ќе има ждрепка и дали сите три екипи кои вчера загубија во баражите за влез во Втора лига ќе имаат директен влез без ждрепка.
