Екипата на Љуботен е старо-нов шампион на Македонија во женскиот фудбал! Во рамките на последното 27. коло од Првата женска фудбалска лига (ПЖФЛ), шампионките со убедливи 4:0 ја совладаа Тиверија Брера на домашен терен, во натпревар без резултатско значење, но со симболично крунисување на успешната сезона.
Резултатот го отвори Екатерина Фролова во 8. минута, а до крајот на натпреварот блескаше голгетерката Хава Мустафа, која постигна хет-трик за конечни 4:0.
Тиверија Брера ја завршува сезоната како вицешампион на Македонија, со што повторно потврди дека е еден од најдобрите женски колективи во земјава.
Ас Јунајтед со голот на Веса Села во 15. минута славеше минимална победа од 1:0 против Скопјe. Каменица Саса направи пресврт и победи со 1:2 на гостувањето во Битола против Топ Гол. Домашните поведоа преку Кристина Мојсоска во 22. минута, но Ана Димитровска со два погодоци ја донесе победата за Саса. Истатов беше убедлив на гости кај Речица со триумф од 2:5. За Речица погодија Софија Величковска и Марија Антевска, додека за Истатов два пати прецизни беа Кристина Петрушевска и Меланија Грозданова, а еден гол постигна Катерина Петкова.
Екипата на Речица ќе ја бара својата шанса за опстанок преку бараж натпревар против амбициозниот второлигаш Вардар, кој пак се надева на историско деби во женската елита.
Во ова последно коло, слободна беше екипата на Атлетико од Битола.
