Поранешниот младински репрезентативец Бесир Демири го продолжи договорот со фудбалскиот клуб Работнички за уште две години. Демири го продолжи ангажманот со „романтичарите“ и се обврза да остане дел од тимот најмалку до 2027 година.
Демири, кој претходно настапуваше за Шкупи, Вардар и Шкендија, се приклучи на Работнички во текот на минатата сезона и беше еден од клучните играчи во остварувањето на пласманот на клубот во Лигата на Конференции.
Во следните денови, раководството на Работнички ќе преговара со играчите на кои им истекуваат договорите, како и ќе работи на ангажирање нови засилувања. Исто така, ќе биде познато и кои фудбалери ќе го напуштат клубот.
Покрај тоа, „романтичарите“ ќе назначат нов тренер, а најсериозен кандидат за наследник на Горан Станиќ, кој замина да ја води младата репрезентација на Македонија до 21 година , е досегашниот негов помошник, Бојан Маркоски.
Виолета Јанчева, Спортска Мрежа
