Денес се одигра дербито на 6. коло во плеј-офот на ракометната Суперлига, помеѓу екипите на Алкалоид и Вардар, во Автокоманда. Истото заврши без победник (26:26), иако момците на Лазаров одиграа одличен натпревар без повредените Ѓорѓиев и Митев, и беа на праг на победа сѐ до самиот крај на мечот.
Првото полувреме беше доста жестоко и рамноправно, се играше гол за гол, а најчесто Алкалоид имаше благо водство. Имаше цврста одбрана со малку погодоци, како и доста расположени голмани- Кизиќ од таборот на Алкалоид и Еспиња кај Вардар.
Во вториот дел, Вардар тргна посконцентрирано и брзо почна да го презема водството, дури и малку се одлепи и со три гола, но домаќините не се предадоа и вратија со една одлична серија на голови, па така некаде на средината на второто полувреме го свртеа резултатот и ја вратија неизвесноста.
Мечот влезе во драматичен финиш, а момците на Лазаров имаа гол разлика на неколку секунди до крајот, меѓутоа тогаш Милан Лазаревски со одличен погодок го донесе ремито за својот тим, па така Вардар освои бод од ова дерби.
Кај Алкалоид, најдобар стрелец беше Мартин Серафимов со осум погодоци, потоа Мартин Ивановски со пет гола, а кај Вардар, Вуко Борозан се истакна со седум голови, додека пак Милан Лазаревски погоди шест пати.
