Слога Виница со 0:2 го доби Светлост во Зрновци и стана шампион во Трета лига – Исток, со што веќе фокусот се става на баражот за Втора лига.
Двата погодоци беа постигнати во првиот дел од мечот кога во 18. минута резултатот го отвори Амар Исљам, а четири минути подоцна погоди Михаил Воинов.
Во вториот дел мрежите мируваа, па резултатот од првиот дел стана конечен со што Слога Виница и математички стана шампион на четири кола до крајот.
Во рамки на 14. коло во Трета лига – Исток на минимална победа од 1:0 се радуваше Хоризонт Турново откако го доби Овче Поле на стадионот „Кукуш“ со гоот на Васко Коцев постигнат во 79. минута.
Тимот од Свети Николе имаше два исклучени играчи. Најпрво во 63. минута поради два жолти картони од игра беше исклучен Давид Манев, а поради два жолти мечот предвреме го заврши и Никола Лазев, поточно во 81. минута од мечот.
Карбинци и Малеш ги поделија бодовите откако одиграа 2:2 во меч каде гостинот од Берово прв дојде до водство во 32. минута со голот на Илија Бојчовски.
Во вториот дел во 63. минута од игра беа исклучени Тоше Стојанов од Карбинци и Денил Дестанов од Малеш поради добиени директни црвени картони, а причините за доделување на црвените картони е насилничко однесување.
Во 67. минута Саше Соколов постигна гол за 1:1, а во 82. минута Бобан Стојанов постигна гол за 2:1 и пресврт. Сепак, во 90. минута Филип Спенџарски ги расплака домашните за конечни 2:2 и делба на бодовите.
Тиверија со реми во Дојран стави крај на серијата порази, откако одигра 1:1 со Дојранско Езеро.
Петар Илиев во 11. минута погоди за 1:0, а во 30. минута Доне Аргиров ги постави конечните 1:1.
Ударник во 89. минута благодарение на голот на Марјан Костадинов се спаси од пораз откако одигра 1:1 против Брегалница од Делчево. За гостинскиот тим погоди Јован Дојчинов.
Слога Виница е прва со 39 бодови со што тимот на Емил Грнев е шампион, а втора е Брегалница од Делчево со 24 бодови.
