Актуелниот шампион Струга Трим Лум пристигна во Анталија, Турција, каде ќе ја одработи главната фаза од подготовките за вториот дел од сезоната, каде стружани водат борба за одбрана на титулата во Првата македонска фудбалска лига.
На сонце и висока температура стружани ќе ја темпираат пролетната форма за нивниот главен предизвик – одбрана на титулата, каде ги очекува повеќе од неизвесна и голема борба.
Досега Струга се засили со Папе Фал од Сенегал, како и со младиот Хамза Меметриза од второлигашот Башкими.
Првиот пријателски натпревар на турско тло Струга го игра на 20. јануари кога за противник ќе ја има добро познатата унгарска екипа на Дебрецин.
Корона Киелце од Полска ќе биде вториот противник на 24. јануари, додека само ден подоцна стружани ќе се соочат со Рубин Казањ од Русија.
Четврти противник на Струга во Анталија ќе биде екипата на Кизилхар од Казахстан, додека на последниот дел од јануари, Струга ќе се тестира со Михаловце од Словачка.
На 1. февруари Струга се враќа во Македонија, а првиот меч од пролетниот дел го игра против Гостивар што ќе биде дерби дуел за титулата и обезбедување на „виза“ за Европа.
