ГРК Охрид го промовираше најновото засилување за пролетниот дел од сезоната – младинскиот репрезентативец на Бразил, Де Соуза Мораис Каио Винициус. 22-годишниот десен бек, кој претходно го носеше дресот на Куманово, ќе го засили тимот во сино-бел дрес најмалку една и пол година.
Винициус беше еден од најдобрите играчи во првиот дел од сезоната во Суперлигата, а со своите одлични настапи и двоцифрен број на голови во неколку натпревари си го обезбеди трансферот во Охрид.
„Многу сум среќен за моето пристигнување во Охрид. Клуб со европски амбиции и колеги професионалци. Од моја страна нема да недостасува посветеност. Се надевам дека ќе имаме успеси во Охрид, мојот нов дом“ – изјави Винициус.
Тимот на Стевче Алушовски се надева дека овој Бразилец ќе биде клучно освежување за ростерот и ќе помогне во борбата за европските места.
