Штипскиот второлигаш Брегалница денес официјално ги започна подготовките за пролетниот дел од сезоната. На Градскиот стадион во Штип, шефот на стручниот штаб Трајче Сенев ја одржа првата прозивка, на која присуствуваа речиси сите фудбалери на кои ќе се смета во продолжението на сезоната.
Од клубот засега го потврдија само трансферот на Стефан Бабунски, кој доаѓа од редовите на Детонит Плачковица. Сепак, се најавуваат нови засилувања во следните денови, заедно со објавување на распоредот за пријателските натпревари. Првиот тест на тимот ќе биде на 18 јануари против Осогово, а се планираат и неколку дополнителни мечеви за време на зимските подготовки.
Во исто време, од екипата на Брегалница замина Јовица Радевски, кој повторно ќе го облече дресот на Детонит Плачковица, како што веќе информира Спортска Мрежа.
Брегалница ја заврши есенската полусезона на второто место во Втората лига со 33 бодови, зад лидерот Македонија ЃП, кој има 38, но пред третопласираниот Башкими со 32. Целта на тимот е јасна – експресно враќање во Првата лига, од која испадна минатата сезона заедно со Македонија ЃП.
Пролетниот дел Брегалница ќе го започне на гостински терен во Прилеп, каде ќе се соочи со Победа, во дуел на два поранешни прволигаши. Под водство на Трајче Сенев, штипските „сини“ се надеваат на успешен старт и чекор поблиску до враќање во елитното друштво.
