Комисијата за планинарски патеки при Федерацијата на планинарски спортови на Македонија (ФПСМ) на 18 октомври 2026 година изврши подновување на маркацијата на потегот од Зла Страна до врвот Карбула, како и поправка на патоказот што по вторпат бил отстранет, а кој ја означува насоката за спуштање од врвот кон Ростушки Мост.
Во рамки на активностите била направена и проценка на состојбата на патеката од Ростушки Мост кон Зла Страна. Од Комисијата посочуваат дека станува збор за атрактивна планинарска патека на која ѝ е потребно поголемо внимание и значително подобрување на неколку делови.
Пред сè, потребно е да се обнови и подобри маркацијата, да се расчисти влезот на патеката кај чешмата, како и излезот од шумата, каде што трасата лесно може да се изгуби во густите грмушки.
Посебно предупредување до планинарите се однесува на тежината на патеката од Ростушки Мост до врвот Карбула. Искачувањето е исклучително тешко, не само поради висинската разлика што треба да се совлада, туку и поради специфичноста на теренот. На повеќе места патеката е пресечена од одрони, има стеснувања и стрмни делници, што дополнително го отежнува движењето.
Од Комисијата за планинарски патеки при ФПСМ нагласуваат дека сите планинари кои планираат да го искачуваат врвот Карбула од Ростушки Мост треба сериозно да ја земат предвид тежината на теренот и да бидат соодветно подготвени.
Задолжително е претходно пријавување на движењето во Националниот парк Маврово, со цел да се придонесе за поголема безбедност при планинарењето во овој предел.
