По серијата предизвици во домашното првенство и ЕХФ Купот, ракометарите на Охрид продолжуваат со обврските во Супер лигата. Во рамките на 10. коло, избраниците на Борис Ројевиќ ќе имаат можност пред своите навивачи да стигнат до нови бодови, а противник ќе им биде составот на Младост Богданци.
Охриѓани влегуваат во натпреварот со фаворитска улога, но во тимот нема простор за потценување. Десниот бек во сино- белиот тим- Томислав Јагуриноски најавува сериозен пристап и максимална посветеност, со цел бодовите да останат во „Билјанини Извори“.
„Младост Богданци е екипа против која мора да пристапиме максимално сериозно и сконцентрирано. Ја имаме фаворитската улога, и на домашен терен сакаме да ја оправдаме со добра игра, максимална ангажираност и освојување на нови бодови пред нашата публика.“- изјави Јагуриноски.
Охрид ќе ја има поддршката од домашните навивачи, а мотивот е јасен – уште едно успешно издание и продолжување на бодовното салдо во Супер лигата. Средбата против Младост Богданци е закажана за петок, 13 ноември, со почеток во 19:30 часот, во салата „Билјанини Извори“.
