Македонските ракометни судии Димитар Митревски и Благојче Тодоровски продолжуваат со европските делегирања. По обврските во Лигата на шампионите и квалификациите за Европското првенство, сега ги очекува нов предизвик на меѓународната сцена.
Европската ракометна федерација им ја довери правдата на дуелот меѓу дански Холстебро и шпанска Торелавега, кој е дел од четвртото коло во групата Ф од Лигата на Европа.
Натпреварот ќе се одигра на 17 ноември, со почеток во 18:45 часот, во „Гракјаер Арена“ во Холстебро. Делегат на средбата ќе биде Финецот Уд.
Дуелот носи и директна пресметка на водечките екипи во групата. Торелавега досега освои шест бода од исто толку можни и се наоѓа на врвот, додека Холстебро со четири бода ја зазема втората позиција.
