Кошаркарската федерација на Македонија побара итна и неотповиклива оставка од претседателот на Македонскиот олимписки комитет, Даниел Димевски, поради несогласувањата околу формирањето на националната репрезентација во кошарка 3х3.
На седницата одржана на 10 ноември, Управниот одбор на КФМ ги потврди досегашните активности на раководството и даде поддршка за преземање правни и институционални чекори за заштита на надлежностите на Федерацијата.
Од КФМ отвораат прашања за можен судир на интереси и непотизам, посочувајќи дека во репрезентацијата е вклучен и синот на претседателот на МОК. Федерацијата нагласува дека изборот на репрезентативците мора да се врши исклучиво според спортските квалитети и резултати, а не под семејни или институционални влијанија.
Спорен е и предложениот Меморандум за соработка, кој предвидувал финансиска поддршка од 100.000 долари, но и значајна улога на МОК во изборот на стручниот кадар и репрезентативците. КФМ тврди дека предложила заедничко стручно тело, но предлогот не бил прифатен.
„Националниот дрес не е ничија семејна привилегија. Тој е чест која се заслужува со квалитет, работа и спортски резултати“, порачуваат од Федерацијата, најавувајќи дека ќе ги искористат сите правни механизми за заштита на своите надлежности и интегритет.
