Во среда ќе се одиграат седум од осумте осминафинални натпревари во Купот на Македонија. Мечевите ќе започнат во 13:30 часот, а последниот патник во четвртфиналето ќе биде познат на 25 ноември, кога АП Брера Струмица ќе се соочи со Арсими од 13:00 часот.
Во осминафиналната фаза ќе настапат девет прволигаши, шест второлигаши и еден третолигаш, а Силекс ја брани Куп титулата.
Програмата за среда носи неколку интересни дуели. Скопје ќе се соочи со Новаци и двете екипи во ПМФЛ и ВМФЛ имаат резултатска криза, прволигашот Струга Трим Лум ќе ја пречека Беласица која е дел од Втора лига, додека Башкими и Шкендија Арачиново ќе ги одмерат силите во прволигашка пресметка.
Вардар ќе игра против Тиквеш во неизвесно дерби, а Пелистер ќе има тежок предизвик против бранителот на куп-трофејот, Силекс. Работнички ќе се соочи со Каменица Саса, единствениот третолигаш во оваа фаза од натпреварувањето, додека Македонија ЃП ќе ги одмери силите со Брегалница.
Парови за осминафиналето на Купот на Македонија:
– Скопје – Новаци
– Струга Трим Лум – Беласица
– Башкими – Шкендија Арачиново
– Вардар – Тиквеш
– Пелистер – Силекс
– Работнички – Каменица Саса
– Македонија ЃП – Брегалница
– АП Брера Струмица – Арсими (25 ноември, 13:00 часот)
Седум екипи в среда ќе обезбедат пласман во четвртфиналето, додека последниот патник ќе биде познат по ноемврискиот дуел меѓу АП Брера Струмица и Арсими. Куп-натпреварите носат дополнителна неизвесност, бидејќи секој дуел е елиминациски и нема простор за поправен испит.
