КК Работнички Скопје го потврди ангажманот на младинскиот репрезентативец Атанасиј Трајанов, кој во новата сезона ќе го носи дресот на скопскиот клуб.
20-годишниот Трајанов во Работнички пристигнува од редовите на второлигашот Партизан Водно Санс, а зад себе има настапи за младинските репрезентации на Македонија.
Трајанов беше дел од генерацијата до 18 години која во 2024 година го освои златниот медал на Европското првенство – Дивизија Б, одржано во Скопје. На турнирот просечно бележеше 6,5 поени и 6,5 скокови за 21 минута на паркетот.
Ова лето, Трајанов повторно беше дел од националниот тим, овојпат со репрезентацијата до 20 години, со која настапи на Европското првенство – Дивизија Б во Братислава.
Висок е два метри и може да одговори на позициите „тројка“ и „четворка“. Неговиот стил го красат борбеноста, енергијата и корисната игра во двата правци.
Работнички во него добива млад и перспективен кошаркар, кој треба да претставува засилување и дополнителна опција во ростерот.
