Ракометниот клуб Младост од Богданци има нешто што секој клуб би го посакал – огромна поддршка од трибините, а меѓу најверните навивачи се издвојува Томица Тасев, човекот кој не пропушта натпревар на својот омилен клуб.
Тасев денес е во Прилеп, каде што Младост настапи на меморијалниот турнир „Миле Нешкоски“. Богданчани во натпреварот за петтото место загубија од Бутел со 32:30, но резултатот не беше причина Тасев да изостане од трибините.
Како и на секој друг натпревар, тој и овојпат беше на гостински терен за да го бодри Младост. Каде и да игра тимот од Богданци – таму е Томица, со силна поддршка за своите ракометари.
Младост по одличната сезона успеа да се врати во Супер лигата, па во новата сезона повторно ќе биде дел од елитното македонско ракометно друштво. Во Богданци владее вистинска ракометна еуфорија, а салата „Млаз“, која доби нов изглед, редовно е исполнета до последното седиште кога игра Младост.
А предводник на таа верна поддршка е токму Томица Тасев. Од Богданци до Прилеп, од домашен до гостински терен – Младост никогаш не е сам.
