Гевгелија, заедно со Скопје, од 6 до 15 август ќе биде домаќин на Европското првенство за кошаркари до 16 години – Б Дивизија, на кое ќе учествуваат 22 национални селекции од цела Европа.
Натпреварите од групите А и Б ќе се играат во спортската сала „26 Април“ и во салата НБ „Ноел“ во Гевгелија. Организаторите ги завршија сите подготовки, а спортските објекти се целосно адаптирани и подготвени за организација на овој значаен меѓународен настан.
Во групата А ќе настапат Словачка, Ирска, Португалија, Црна Гора и Холандија, додека во групата Б ќе се натпреваруваат Македонија, Украина, Швајцарија, Хрватска, Исланд и Кипар.
Организацијата на ова првенство претставува големо признание за Гевгелија и уште една потврда дека градот успешно се етаблира како домаќин на големи спортски манифестации.
Од КК Кожув ги повикаа љубителите на кошарката да ја исполнат салата и да им дадат силна поддршка на младите македонски кошаркари, а воедно им посакаа добредојде на сите репрезентации, гости и навивачи кои ќе бидат дел од шампионатот. Нека победи спортот!
