КК Пелистер продолжува со формирањето на тимот за сезоната 2026/27, а клубот претстави уште две нови засилувања. Иван Сапунџиев е четвртото, а Виктор Златевски петтото ново име во ростерот на битолскиот состав.
Сапунџиев се враќа во Пелистер, каде што настапуваше во периодот од 2022 до 2024 година, играјќи во домашното првенство и во АБА лигата. Искусниот бек, роден на 13 мај 1995 година во Скопје, е висок 197 сантиметри и зад себе има богата кариера во македонската кошарка. Покрај Пелистер, настапувал и за Карпош Соколи, Фени Индустри, Вардар и ТФТ Скопје.
Петтото засилување е 25-годишниот бек Виктор Златевски, кој потпиша едногодишен договор со клубот и ќе му се приклучи на тимот на почетокот на подготовките за новата сезона. Тој доаѓа од Феникс 2010, а претходно беше дел од Гостивар, Работнички и ФМП Академија. Во младинските категории го носеше и дресот на репрезентацијата на Македонија до 18 години.
Златевски зад себе има успешна сезона во која бележеше просек од 10,7 поени, 1,6 скока и 2,6 асистенции по натпревар, а со неговото ангажирање Пелистер дополнително ја засилува бековската линија пред почетокот на новата сезона.
