Кошаркарската федерација на Македонија со задоволство ја поздрави официјалната одлука на КК Арис од Солун, со која грчкиот клуб потврди дека нема да има пречки Ненад Димитријевиќ да биде на располагање на македонската репрезентација од 16 август 2026 година.
Од Арис му посакаа успех на македонскиот национален тим, а овој потег претставува пример за спортска коректност и почит кон репрезентативните обврски. КФСМ упати благодарност до раководството на клубот за ваквиот став.
Со ова практично се надминати сите дилеми околу можните пречки поврзани со клупските обврски на еден од најдобрите македонски кошаркари.
Ова е позитивна вест за македонската кошарка и за навивачите кои сакаат репрезентацијата да настапи во најсилниот состав. Сега вниманието е насочено кон списокот на селекторот и кон одлуката на самиот Ненад Димитријевиќ дали ќе одговори на повикот.
Од Федерацијата веруваат дека Димитријевиќ повторно ќе го облече дресот со државниот грб, бидејќи настапот за Македонија претставува чест и голема одговорност.
На крајот на август македонската репрезентација ја очекува важен гостински натпревар против Австрија, со кој ќе го започне новиот претквалификациски циклус. Во такви моменти, присуството на најдобрите кошаркари е од огромно значење за остварување на зацртаните цели.
Кошаркарската федерација на Македонија продолжува да работи на создавање позитивна атмосфера околу националниот тим и верува дека сите репрезентативци, без разлика каде настапуваат, ја препознаваат важноста на дресот со државниот грб.
