Машката одбојкарска репрезентација на Македонија до 20 години ја очекува исклучително силна конкуренција на Зонските квалификации за Европското првенство 2027, кои од 25 до 29 август ќе се одржат во Софија, Бугарија.
По одлуката на Европската одбојкарска конфедерација (ЦЕВ) селекциите на Русија и Белорусија повторно да настапуваат во рамките на БВА Балканските шампионати, кои воедно служат и како Зонски квалификации, македонските надежи ќе се соочат со едни од најсилните репрезентации во регионот – Бугарија, Србија, Турција, Русија и Белорусија.
За разлика од женскиот турнир, каде што се игра по групи, машката конкуренција ќе се натпреварува по системот „секој со секого“.
Македонија настапот ќе го отвори на 25 август со дуел против домаќинот Бугарија, кој започнува во 17:30 часот. Ден подоцна, во истиот термин од 15:00 часот, следува пресметка со Белорусија, а на 27 август нашите одбојкари ќе играат против Србија. На 28 август, со почеток во 20:00 часот, ќе се сретнат со Русија, додека последниот натпревар ќе го одиграат на 29 август од 17:30 часот против Турција.
Подготовките за квалификациите започнуваат на 5 август во Крушево. Селекторот Јован Шапе и неговиот асистент Миодраг Новески повикаа 18 перспективни одбојкари, кои доаѓаат од девет македонски клубови.
