Машката младинска репрезентација на Македонија забележа убедлива победа над Грузија со 97:62 во првиот натпревар од разигрувањето за пласман на Европското првенство од Дивизијата „Б“ во Братислава.
Избраниците на селекторот Никола Велев од самиот старт го презедоа водството и со сигурна игра во нападот и цврста одбрана не му оставија многу простор на противникот. По првата четвртина Македонија водеше со 22:16, а одличната втора делница донесе двоцифрена предност и резултат 53:35 на полувремето.
Македонската селекција прикажа одлична тимска игра, а дури осуммина кошаркари се запишаа меѓу стрелците во првите 20 минути. Најефикасни во тој период беа Младеновски, Луканоски и Димитриев со по осум поени, додека Ќириловски додаде седум. Во текот на втората четвртина Македонија стигна и до највисоки 20 поени предност (44:24).
По паузата, македонските младинци продолжија со истото темпо. До средината на третата четвртина поведоа со 68:42, а пред последните десет минути имаа сигурни 78:53. Во завршницата само ја потврдија својата доминација, зголемувајќи ја разликата за конечни 97:62.
Дури петмина македонски репрезентативци натпреварот го завршија со двоцифрен број поени. Најефикасен беше Марко Луканоски со 16 поени и шест скока, Трајанов и Димитриев постигнаа по 13 поени, а Марјановиќ и Младеновски реализираа по 11.
Со овој убедлив триумф Македонија избори пласман во разигрувањето за позициите од 9. до 12. место на Европското првенство.
Во следниот натпревар, македонската репрезентација ќе се соочи со победникот од дуелот меѓу Холандија и Кипар, во борбата за што подобар конечен пласман во Братислава.
