ГРК Овче Поле 1958 официјално ги започна активностите за формирање на тимот за натпреварувачката сезона 2026/2027. Раководството на клубот, во координација со стручниот штаб, интензивно работи на комплетирање на играчкиот кадар со јасна цел – да изгради конкурентен, квалитетен и амбициозен состав кој ќе биде подготвен да одговори на сите предизвици што ги носи новата сезона.
Од клубот потенцираат дека нивната определба останува непроменета – континуиран напредок, остварување што подобри резултати и достоинствено претставување на клубот, Свети Николе и навивачите.
Во рамки на подготовките за новата сезона, Овче Поле 1958 го промовираше и првото засилување. Нов член на тимот е Филип Петровски, кој настапува на бековската позиција.
Петровски своите први ракометни чекори ги направил во школата на Металург, а во досегашната кариера настапувал за Јуниор Кисела Вода, Металург РА и Драчево Јуниор. Од клубот веруваат дека неговиот квалитет, борбеност и победнички менталитет ќе претставуваат значајно засилување и ќе помогнат во исполнувањето на амбициите во претстојната сезона.
Покрај новото засилување, раководството обезбеди и продолжување на соработката со капитенот Кристијан Стаменков. Лидерот на тимот и еден од најважните играчи ќе продолжи да го носи дресот на ГРК Овче Поле 1958 и во новата сезона.
Стаменков со години е еден од столбовите на екипата и симбол на клубот, а со својата пожртвуваност, борбеност и капитенски дух останува пример како се брани клупскиот грб и како се игра со срце за своите бои. Пред него и неговите соиграчи се нови предизвици и нови битки, а капитенот повторно ќе ја предводи екипата во поход кон нови успеси.
Од ГРК Овче Поле 1958 најавуваат дека во наредниот период јавноста ќе биде запознаена и со останатите нови засилувања кои ќе го носат дресот на клубот во сезоната 2026/2027, а воедно упатија благодарност до сите навивачи, пријатели и поддржувачи за континуираната доверба и поддршка, истакнувајќи дека токму тие се нивната најголема мотивација.
