Машката младинска репрезентација на Македонија со победа ја затвори групната фаза на Европското првенство од Дивизијата „Б“ во Братислава. Во последниот натпревар од групата „А“, избраниците на селекторот Никола Велев го совладаа Азербејџан со 67:57 и со вториот триумф на шампионатот го освоија третото место во групата, кое им носи продолжение на натпреварувањето во разигрувањето за пласман од 9. до 16. место.
Азербејџан подобро го отвори натпреварот и уште во првата четвртина создаде солидна предност. Нашиот противник ја контролираше играта во воведните десет минути и стигна до највисоки +9 (25:16), резултат со кој беше затворена првата делница.
Во втората четвртина Македонија значително ја подобри играта во одбраната, но нападот сè уште не функционираше во посакуваниот ритам. Нашите кошаркари се доближија на само два поени негатива (25:27), но во завршницата на полувремето останаа без поени од игра, што Азербејџан го искористи за нова серија и замина на одмор со водство од 32:25.
Противникот повторно се одвои на двоцифрена разлика во третата четвртина (43:32), но токму тогаш следуваше најдобриот период во играта на Македонија. Предводени од Марко Луканоски и Коста Ќириловски, нашите младинци ја намалија разликата на 44:47, а потоа и на само два поени (47:49). Пресвртот беше комплетиран со тројката на Сергеј Младеновски за прво водство (50:49), по што Даријан Димовски реализираше за 52:49 и ја заокружи серијата со која Македонија целосно го презеде ритамот на натпреварот.
Самодовербата стекната во завршницата на третата четвртина беше пренесена и во последниот период. Македонија ја контролираше играта, а на средината од четвртата четвртина имаше предност од 63:55, која сигурно ја зачува до конечните 65:55.
Марко Луканоски беше најистакнат во македонскиот состав со „дабл-дабл“ учинок од 15 поени и 14 скока. Коста Ќириловски натпреварот го заврши со 16. поени и шест скока, додека Сергеј Младеновски придонесе со 10 поени, пет скока и пет асистенции.
На Европското првенство следува слободен ден, а од 17 јули започнува елиминациската фаза. Како третопласирана селекција од групата „А“, Македонија ќе ги продолжи настапите во разигрувањето за пласман од 9. до 16. место, каде ќе се сретне со Грузија, противник од групата „Б“.
