Повратникот во Првата македонска фудбалска лига, Брегалница, официјално го претстави своето прво летно засилување. Нов член на штипскиот клуб е искусниот 27-годишен офанзивец Мартин Стојанов, кој пристигнува од редовите на Тиквеш и повторно ќе го носи дресот на „сините“.
Стојанов добро ја познава средината во Штип, бидејќи и претходно беше дел од Брегалница. Во својата кариера настапуваше и за Кит Го од Пехчево, додека интернационално искуство стекна во Бугарија, каде го носеше дресот на Септември Софија. Воедно, тој е и поранешен младински репрезентативец на Македонија.
Минатата сезона Брегалница ја освои шампионската титула во Втората македонска фудбалска лига и обезбеди директен пласман во елитното друштво.
Клубот веќе е во тренажен процес и активно работи на комплетирање на играчкиот кадар за новите прволигашки предизвици.
Како што претходно ексклузивно објави Спортска Мрежа, Стојанов е само првото од повеќето планирани засилувања. Според информациите, во наредните денови Брегалница ќе ги промовира и останатите нови фудбалери, со кои ќе се формира конкурентен тим за настап во Првата македонска фудбалска лига.
Како што ексклузивно објави Спортска Мрежа, ново засилување на Брегалница е и искусниот дефанзивец Дарко Стојанов.
Новата сезона во македонската фудбалска елита започнува на 25 јули, а Брегалница ќе ја отвори со гостување кај актуелниот шампион Вардар.
