Женската јуниорска репрезентација на Македонија интензивно ги продолжува подготовките за Европското првенство од Дивизијата „Б“, кое од 29 јули до 7 август ќе се одржи во Тулчеа, Романија.
По одиграните два контролни натпревари против Бугарија, стручниот штаб направи детална анализа на настапите, а следната проверка на националниот тим ќе биде против селекцијата на Косово.
Селекторот Виктор Петровски истакна дека е задоволен од посветеноста и односот на репрезентативките, но потенцира дека има уште работа за тимот да биде целосно подготвен за настапот на Европското првенство.
„Задоволен сум од желбата и енергијата што ја покажуваат девојките. Работат посветено, имаат одличен пристап и на секој тренинг влегуваат максимално мотивирани.
Контролните натпревари против Бугарија ни дадоа добра слика за моменталната форма на екипата. Забележавме многу позитивни работи, но и одредени сегменти кои треба да ги подобриме пред почетокот на Европското првенство. Иако во моментов не сме комплетни поради неколку повредени кошаркарки, подготовките се одвиваат според предвидениот план“, изјави Петровски.
Во следните денови репрезентацијата ќе продолжи со тренажниот процес, а селекторот се надева дека повредените Колева, Димитровски, Груевска и Милосављевиќ наскоро ќе се приклучат на тимот.
„Нè очекува уште еден контролен натпревар против Косово, кој ќе биде добра можност да го провериме напредокот, дополнително да ја подобриме играта и што е можно поподготвени да го дочекаме стартот на Европското првенство“, додаде Петровски.
