Како што се ближи крајот на сезоната во Првата македонска фудбалска лига, битката за што подобар пласман станува се поинтересна, а секој тим јасно ја има зацртано својата цел. ФК Пелистер, клуб со богата традиција и големо значење за битолскиот спорт, имаше тежок старт на сезоната, па се уште не го има обезбедено опстанокот во елитата за следната сезона.
Сепак, „зелено-белите“ во пролетниот дел прикажуваат далеку подобри изданија и освојуваат важни бодови во клучниот период од шампионатот. По ремито со ФК Работнички и позитивните резултати противФК Вардар, Шкендија и Силекс битолчани сега на домашен терен го пречекуваат Шкупи со јасна цел – продолжување на позитивната серија и чекор поблиску до сигурен опстанок.
“Иако Шкупи настапува со подмладен состав, нашиот респект кон овој клуб со голема традиција и голем број освоени трофеи мора да биде на ниво. Никој не смееме да потцениме, бидејќи нивните играчи се борат до последно и се обидуваат „скапо да си ја продадат кожата“. Пелистер преферира сам да си ја заврши работата и да не чека како ќе завршат другите натпревари. Согласно тоа, од играчите секогаш го барам истото, да играат дисциплинирано и ангажирано, односно на терен да ја покажат желбата за победа и својот квалитет, а не со празни зборови. Ние мора да си го одработиме нашиот дел, бидејќи опстанокот во ПМФЛ нема да се случи ако континуирано не освојуваме бодови и не ги користиме шансите. Затоа повеќе пати апелирав играчите добро да се мотивираат и во никој случај да не го потценат противникот“, изјави Марјан Секуловски, шеф на стручниот штаб на Пелистер.
Габриел Крстевски пак додава дека:
“Свесни сме дека сме фаворити, но тоа мора да го покажеме на терен. Ќе влеземе максимално мотивирани во натпреварот бидејќи тој може да ни донесе три важни бода. Слично како натпреварот со Македонија ЃП, мора да бидеме максимално мотивирани и фаворитската улога да ја покажеме низ нашата игра“.
