Охрид се пласираше во финалето на ЕХФ Европскиот куп, а тренерот Борис Ројевиќ по историскиот успех истакна големо задоволство од тимот и борбеноста низ целата сезона.
Ројевиќ, во изјава за Спортска Мрежа, нагласи дека со кратка ротација тимот се натпреварувал на три фронта – во домашниот Куп, домашното првенство и Европа, што речиси претставува невозможна мисија. Сепак, според него, играчите покажале неверојатен карактер, максимална пожртвуваност и срце на теренот, што на крај било наградено со историски успех. Тој додаде и дека Татабања е исклучително силен противник, но дека Охрид нема што да загуби бидејќи веќе испишал историја.
„Пресреќен сум, со оваа кратка ротација да се игра добро и во Купот, и во домашното првенство, и во европскиот Куп..тоа е речиси невозможна мисија. Меѓутоа, овие момци се носат со тоа одлично, го даваат последниот атом сила од себе.. и сите ја даваме својата душа и срце за овој клуб, за Охрид..и мислам дека тоа и ни се врати на крајот. Што се однесува до противникот во финалето – Татабања.. јас не знам дали во последниве 10 години постои клуб со поголем буџет во овој Куп, кој во последниве 10 години пак, е досега најсилен..но нема што да загубиме, ние веќе испишавме историја.“- изјави Ројевиќ за Спортска Мрежа.
Охрид со историски пласман влегува во финалето против Татабања, со јасна порака дека тимот веќе ја надминал својата почетна цел, но ќе се обиде да оди и чекор понатаму.
