Игор Ангеловски е новиот селектор на фудбалската репрезентација на Таџикистан, со задача да го подготви тимот за завршниот турнир на Азискиот куп, кој е закажан за 2027 година во Саудиска Арабија.
50 годишниот фудбалски стратег по заминувањето од селекторската функција на македонската фудбалска репрезентација, продолжи со тренерска кариера во странство, водејќи ги екипите на Горица, Каспиј и Етникос Ахна. Сега повторно се враќа на селекторска позиција, овојпат на азиската фудбалска сцена.
Тој својата тренерска кариера ја започна во ФК Работнички, каде остави силна трага и постигна значајни успеси. Со клубот ја освои шампионската титула и триумфираше во Купот на Македонија во сезоната 2013/2014, а истите успеси ги повтори и една година подоцна, потврдувајќи ја својата успешна работа и тренерски квалитети во македонскиот фудбал.
Тој ќе остане запаметен по најголемиот успех во историјата на македонскиот фудбал, кога со националниот тим ја однесе Македонија на Европското првенство во 2021 година, историски настап кој го запиша неговото име меѓу најуспешните селектори во земјата.
