Ракометна вечер исполнета со емоции, борбен дух и верба во историски успех го очекува Охрид, кој во сабота го игра реваншот од полуфиналето во ЕХФ Европскиот Куп против Целје.
Во преполната сала „Билјанини Извори“, каде се очекува вистински ракометен спектакл, тимот ќе има поддршка од трибините во обид да ја анулира минималната негатива и да направи чекор кон финалето.
Пред овој голем предизвик, капитенот и крилниот играч на ГРК Охрид, Гоце Ојлески, за Спортска Мрежа ги сподели своите очекувања, нагласувајќи ја важноста на фокусот и континуитетот во играта во текот на сите 60 минути.
Во својот коментар, Ојлески направи анализа на првиот натпревар, кој се одигра во Целје минатиот викенд, и јасно потенцира дека екипата мора да биде многу постабилна ако сака позитивен исход против квалитетниот противник од Словенија.
„Секако дека нема да биде лесен натпревар..на гостинскиот меч во играта можеби имавме две лица- имавме добри моменти, но имавме и падови..напорно работиме и сакаме да го поправиме тоа и да изгледаме како што треба во текот на сите 60 минути. Нема да биде лесен натпревар, без разлика што имаме само гол негатива за ,,бркање”, Целје е квалитетен противник- доста добра, млада екипа, технички се добро подготвени и добро трчаат, добро играат. Ние, се надеваме дека на домашен терен и со уште поголема поддршка од нашите навивачи ќе изгледаме многу подобро отколку таму, и ќе дадеме сè од себе за да го направиме тој исчекор, да одиме во финале, што претставува голем и историски успех за нашиот клуб.”- изјави Ојлески за Спортска Мрежа.
Гоце Ојлески испраќа јасна порака дека тимот верува во себе и во силата на домашниот терен, каде ќе се бара тој клучен чекор кон финалето. Со преполна сала и силна енергија од трибините, Охрид ќе се обиде да испише нова европска приказна.
