Ракометниот клуб Вардар продолжува со градење на тимот за следната сезона, откако го договори ангажманот на францускиот среден бек Матео Фадуил. 23-годишниот ракометар ќе се приклучи на „црвено-црните“ и ќе претставува значајно засилување на бековската линија.
Фадуил доаѓа од редовите на Трембле, каде настапува од 2022 година и се етаблира како еден од најважните играчи во составот. Целата негова досегашна кариера е поврзана со Франција, каде што ги помина и младинските категории на Нант, клуб во кој важеше за голем талент. Во текот на кариерата настапувал и за Кретеј и Саран, каде дополнително го надградуваше својот квалитет.
Во актуелната сезона, Фадуил е меѓу најистакнатите поединци во француското првенство. Според официјалната статистика, има постигнато 160 голови од 266 обиди, што претставува одлична реализација од 60,15 проценти. Со тие бројки, моментално се наоѓа на високото четврто место на листата на стрелци во една од најсилните лиги во Европа.
Со вакви перформанси, јасно е дека Вардар добива ракометар кој може веднаш да направи разлика на теренот, но и да биде долгорочно решение на позицијата среден бек.
По потпишувањето, новото засилување не ја криеше својата возбуда за новиот предизвик.
„Здраво на сите! Навистина сум возбуден што доаѓам во овој историски ракометен клуб. Едвај чекам да се запознаам со сите неверојатни навивачи на Вардар и да му помогнам на тимот да победи на што е можно повеќе натпревари и да освои што е можно повеќе трофеи. Се гледаме наскоро – ајде да направиме арената да грми!“
