Центарот за едукација на тренери при ФФМ во Дојран започна со обука на нова генерација кандидати за УЕФА А лиценца.
Наставата се одвива во три модули. Првиот модул беше посветен на теоретски предавања, кои ги реализираа директорот на Центарот за едукација Борче Христов, професор Жикица Тасевски, професор Вујица Живковиќ и селекторот на младинската репрезентација на Македонија, Горан Станиќ.
Во делот за судиски правила излагање имаше поранешниот меѓународен фудбалски судија Горан Спиркоски, додека д-р Михајло Ивановски зборуваше за превенција и справување со спортски повреди.
Значаен дел од обуката беше работата со гостин-предавачот од Србија, Милош Милојевиќ, еминентен тренер со искуство во повеќе од 20 европски клубови (Црвена Звезда, Малме, Хамарби, Ландскрона, Ал Аин, Викингур, Бран, Бреидаблик, Ал Васл, Шарјах и Мјалби).
Со него кандидатите работеа на различни системи на игра, периодизација, како и на офанзивна и дефанзивна транзиција.
Модулот беше збогатен со нови содржини согласно новата УЕФА конвенција за тренери. Со Горан Станиќ се работеше анализа на сопствена и противничка екипа, како и практични активности на терен.
Вкупниот фонд изнесува 180 часови, односно по 60 часови по модул. Меѓу учесниците се и поранешните репрезентативци Стевица Ристиќ, Владе Лазаревски, Ферхан Хасани, Илија Несторовски и Стефан Спировски.
