На терените на ТК „Југ“ во Скопје изминатата недела се одржа меѓународниот тениски турнир за играчи до 14 години „Југ Опен“ (категорија 3), на кој настапија млади тенисери и тенисерки од повеќе земји.
Во машка и женска поединечна конкуренција, титулите ги освоија Кајус Селиукас од Литванија и Софија Трибол од Украина.
Од македонските претставници, најдобар резултат забележа Андреј Темов, кој заедно со Ленарт Кадриу од Швајцарија стигна до финалето во двојки. Таму беа поразени од Сами Дамани (Франција) и Џем Капукиран (Турција) со 2-1 во сетови (6:2, 5:7 и 10:7 во решавачкиот тај-брејк). Темов имаше солидна недела и претходно, кога на турнир во Тирана стигна до полуфинале во сингл и финале во двојки.
Кај девојките, Деа Крстевска беше најуспешна македонска натпреварувачка. Таа стигна до четвртфинале во сингл, каде беше елиминирана од идната победничка Трибол, додека во двојки заедно со Наталија Сулавер од Босна и Херцеговина играше полуфинале.
Од утре, на истите терени стартува нов турнир за играчи до 18 години – „Скопје Опен 2026“.
