На четири кола до крајот од сезоната во ракометната Супер лига, веќе се расчистуваат дилемите околу долниот дел од табелата. Радовиш е тимот кој ќе се пресели ранг подолу, откако не успеа да обезбеди опстанок и следната сезона ќе настапува во Првата лига.
За радовишани ова значи ново разочарување, ако се знае дека само пред две сезони преку баражот изборија камбек во елитата, но престојот меѓу најдобрите траеше кратко односно две сезони.
Од друга страна, Струга повторно ќе мора да го бара спасот преку бараж. Стружани втора година по ред ќе играат ваков натпревар за опстанок, откако минатата сезона успеаја да ја задржат суперлигашката позиција откако во баражот славеа над Мулти Есенс.
Според моменталната ситуација, нивни противник би требало да биде Младост Богданци, но сценариото може да претрпи промени. Клубот од Богданци веќе изрази незадоволство од судењето од мечот со Драчево Јуниор, кој заврши нерешени (27:27) и најави можност за повлекување од шампионатот, што би ја искомплицирало целата разврска.
Доколку дојде до таков развој, во игра за баражот би влегол тимот на Драчево Јуниор. Конечната слика околу баражот се очекува да биде позната многу скоро, по одлуката на раководството на Младост.
