Македонскиот судија Игор Стојчевски е избран за учество во новото издание на „Програмата за таленти и менторство“ на УЕФА за сезоната 2026/2027, што претставува значајно признание за неговата досегашна работа и потенцијал.
Програмата стартуваше оваа недела во Нион, каде најперспективните европски судии ја одржаа првата средба со своите ментори – поранешни елитни интернационални арбитри кои ќе ги водат низ нивниот понатамошен развој.
Во актуелното издание учествуваат 14 судии (10 мажи и 4 жени) од 12 национални асоцијации, а меѓу нив е и Стојчевски како претставник на Македонија. Негов ментор е легендарниот турски судија Џунејт Чакир, кој има богато искуство од најголемите европски и светски натпреварувања.
Станува збор за едногодишна програма чија цел е дополнително усовршување на најталентираните судии преку директна соработка со искусни ментори, кои ќе ги следат нивните настапи и ќе обезбедуваат стручни анализи, насоки и поддршка.
Учеството во оваа програма отвора можност за понатамошен напредок во судиската кариера, како и потенцијална промоција во повисока категорија на УЕФА во следните години.
Изборот на Стојчевски е уште една потврда за континуираниот развој на македонското судење и вложувањата во квалитет и едукација од страна на Фудбалската федерација на Македонија.
