Поранешниот претседател на Фудбалската федерација на Македонија, Муамед Сејдини, утринава е уапсен во полициска акција спроведена од Министерството за внатрешни работи во координација со Јавното обвинителство.
Сејдини се сомничи за сериозни финансиски злоупотреби поврзани со средства доделени од УЕФА за развој на фудбалот во Македонија. Според првичните информации, станува збор за проневера во износ од околу 700.000 евра, средства кои биле наменети за инфраструктурни проекти, конкретно за изградба на стадион во Охрид.
Како клучен момент за отворање на истрагата се посочува доаѓањето на новото раководство на ФФМ. При преземањето на функциите биле констатирани низа неправилности во финансиското работење на претходното раководство, по што случајот бил пријавен во МВР.
„Во рамките на предмет оформен од ОЈО Скопје, полициски службеници од Одделот за сузбивање на организиран и сериозен криминал и Одделот за криминалистичка полиција лишија од слобода едно лице поради дејствија кои упатуваат на сомненија за сторени кривични дела – проневера и злоупотреба. Се уште се преземаат дејствија по наредба на јавниот обвинител, а повеќе детали за понатамошниот тек на постапката ќе бидат споделени по завршувањето на дејствијата кои се во тек“, информираат од Основното јавно обвинителство Скопје.
Инаку, Сејдини претходно доби двегодишна забрана за вршење функција, што дополнително го става во фокус неговото работење во изминатиот период.
