Центарот за едукација при Фудбалската федерација на Македонија успешно го реализираше четвртиот модул (Модул 4) од УЕФА ПРО курсот, кој се одржа во хотел „Хилтон“ во Скопје и на тренинг центарот „Петар Милошевски“.
На отворањето на семинарот се обрати Руд Доктер, технички инструктор на УЕФА и ментор на ПРО курсот во Македонија. Тој изрази силна поддршка за кандидатите и одржа предавање на тема „Тимска култура и развој на тимот“.
Стекнувањето на УЕФА ПРО лиценцата има големо значење како за тренерите, така и за федерацијата, особено во насока на унапредување на квалитетот и примена на современи методи во модерниот фудбал. Со интерактивен пристап и вклучување на учесниците преку прашања и дискусии, Доктер успеа да го направи овој модул особено динамичен и интересен.
Во рамки на програмата, свои предавања одржаа и директорот на Центарот за едукација на тренери, Борче Христов, кој говореше за „Разбирање на профилите на играчите во модерниот фудбал“, професорот Вујица Живковиќ со темата „Мониторинг на оптоварувањето во врвниот фудбал“, како и професорот Жикица Тасевски, кој се осврна на „Статистика, дијагностика и нивната примена во современиот фудбал“.
Дополнителна вредност на модулот беше присуството на познатиот српски тренер Владан Милојевиќ, поранешен стратег на Црвена ѕвезда, кој заедно со својот стручен штаб (Небојша Милошевиќ, Иван Вучетиќ и Бојан Офенбехер) учествуваше во завршните денови од семинарот. Тие ја презентираа својата програма на тема „Периодизација“ и ги споделија принципите на работа, притоа одговарајќи на бројни прашања од кандидатите.
Од Центарот за едукација најавуваат дека и во иднина ќе продолжат со ангажирање на реномирани тренерски имиња, со цел пренесување на нови знаења и современи пристапи на идните носители на ПРО лиценцата.
До крајот на програмата преостануваат уште три модули, кои ќе овозможат дополнителна надградба преку интензивни предавања, практични работилници и дискусии со врвни домашни и меѓународни експерти. Наставата ќе се реализира според современи методи и во согласност со новата УЕФА конвенција.
Центарот за едукација ќе продолжи да работи со мотивирани и посветени кандидати, додека едукаторите ќе го споделуваат своето знаење и искуство, како основа за нивниот понатамошен развој во тренерската професија.
Фудбалската федерација на Македонија им честита на сите учесници за нивната посветеност и професионализам и останува посветена на континуирано унапредување на тренерската едукација во земјата.
