Југоисточна Македонија во месец мај ќе биде во знакот на младинскиот фудбал, а Интернационал Мастерс Куп 2026 продолжува да ја гради својата елитна приказна со ново име во фокусот. Најновиот учесник на турнирот е српскиот клуб Чукарички, кој ќе настапи со своите млади категории.
Чукарички, клуб кој оваа година одбележува 100 години постоење, е основан во Белград во 1926 година и е препознатлив по својата силна младинска школа и посветеност кон развојот на млади таленти. Нивното учество претставува голема чест за турнирот и носи дополнителен квалитет, дисциплина и натпреварувачки дух на терените.
Турнирот ќе се одржи од 22 до 24 мај во Валандово, Дојран и Гевгелија, каде љубителите на фудбалот ќе имаат можност да уживаат во вистински младински спектакл.
Покрај Чукарички, своето учество веќе го потврдија и повеќе реномирани европски клубови, меѓу кои се Црвена Звезда, Бешикташ, Панатинаикос, Гент и Фенербахче, што дополнително ја засилува конкуренцијата и го потврдува елитниот карактер на турнирот.
На турнирот ќе настапат екипи во повеќе возрасни категории (U8 до U12), со модерен формат кој вклучува групна и нокаут фаза, како и загарантирани повеќе натпревари за секој тим.
Организаторите најавуваат врвни услови за игра, професионално судење и силен акцент на фер-плеј и развој на младите фудбалери.
Интересот за учество е голем, а пријавите се веќе во тек. Поради ограничениот број на места, клубовите се повикуваат навреме да ја обезбедат својата позиција.
Спортска Мрежа – ексклузивен медиумски покровител
Спортскиот портал Спортска Мрежа ќе биде ексклузивен медиумски покровител на турнирот, носејќи комплетно покривање со вести, фотографии и видеа, со што љубителите на фудбалот ќе можат да уживаат во секој момент од ова големо фудбалско случување. Натпреварите ќе можете да ги следите во живо на YouTube каналот на Спортска Мрежа.
Со ваков состав на учесници, Интернационал Мастерс Куп 2026 сериозно најавува дека ќе прерасне во традиционален и престижен турнир, додека Валандово, Дојран и Гевгелија ќе бидат домаќини на вистински фудбалски спектакл
