ГРК Охрид продолжува со засилувањата за новата сезона, а најново име во ростерот е македонскиот повремен репрезентативец Мартин Карапалевски, кој потпиша договор со клубот најмалку до 2028 година.
26-годишниот ракометар, кој настапува на позицијата среден бек, ќе го носи дресот со број 11 и се очекува да има значајна улога во амбициите на охридскиот тим.
Карапалевски зад себе има богато искуство, а во Охрид доаѓа од шпанското првенство, каде во изминатите две сезони настапуваше за Ваљадолид и прикажуваше одлични партии.
Пред интернационалниот предизвик, тој беше дел и од редовите на РК Вардар 1961, каде стекна драгоцено искуство на највисоко ниво.
Со висина од 178 сантиметри, Карапалевски е играч кој се одликува со брзина, преглед на игра и креативност на позицијата организатор, што треба да донесе дополнителен квалитет во играта на ГРК Охрид.
„Се радувам што ќе бидам дел од ГРК Охрид, клуб кој расте од година во година. Уште од првите разговори ми се допадна идејата и проектот по кој клубот сака да се движи во наредните години. Со нетрпение чекам да настапам пред охридската публика и верувам дека заедно ќе се радуваме и ќе ги исполниме целите на клубот.“ – изјави Карапалевски.
Со ова засилување, Охрид јасно покажува дека има сериозни амбиции за наредната сезона и дека ќе биде конкурентен на домашната сцена.
