Овој викенд во Струмица ќе се одржи завршниот турнир од Купот на Македонија, каде четирите најдобри екипи ќе се борат за трофејот. Во првото полуфинале ќе се сретнат ГРК Охрид и Еурофарм Пелистер, додека во второто Вардар ќе игра против Алкалоид.
Пред големиот предизвик, ракометарите на ГРК Охрид најавуваат максимална борбеност и мотив за историски успех.
Голманот на охриѓани, Кристијан Пилиповиќ истакнува дека тимот со голем ентузијазам влегува во завршниот турнир, нагласувајќи дека ова е прва реална шанса за освојување трофеј, но и дека ривалот носи сериозен квалитет, што го прави полуфиналето дополнително тешко и предизвикувачко. Тој додава дека Охрид ќе се обиде да го искористи секој момент и да остане конкурентен до самиот крај.
„Се радуваме на овој турнир, ова е наша прва прилика за освојување трофеј. Ривалите ни се на врвно ниво, а полуфинале против екипа од Лигата на Шампиони претставува голем предизвик. Ќе дадеме сè од себе да создадеме шанса за да продолжиме понатаму и да ја искористиме“, изјави Пилиповиќ.
Полуфиналето меѓу ГРК Охрид и Еурофарм Пелистер ќе се одигра во петок (17.04.2026) во салата „Парк“ во Струмица, со почеток од 17:00 часот.
