Во време кога детскиот фудбал носи радост и искрени емоции, од Скопје доаѓа една прекрасна приказна – приказната за младата Калија Зафировска, фудбалерка која веќе сега покажува дека пред неа стои светла иднина.
Калија, родена на 1 јуни 2016 година, настапува за екипата на Спартак од Скопје, каде тренира под водство на тренерот Филип Јакимоски. Tаа рамноправно се носи со момчињата и тоа со стил. Нејзин прв тренер е Борис Чурлинов.
На еден од натпреварите во детската лига на ФФМ, Калија која има нецели десет години го привлече вниманието со неверојатна акција – неколку технички потези, одлично проигрување, а потоа и еврогол од далечина за воодушевување на присутните. Спартак славеше со 2:0 против Драчево, но моментот на мечот без дилема беше магијата на малата Калија.
Нејзината љубов кон фудбалот започнува уште од прво одделение. Денес, како ученичка која ќе го заврши четврто одделение, веќе има три години континуирани тренинзи – и тоа во машка конкуренција. Планот е да продолжи по истиот пат до 12-13 години, кога ќе се приклучи во женски фудбалски клуб.
Интересно е што Калија е единственото девојче кое учествувало на камп на Црвена Звезда во Скопје пред две години – уште еден доказ за нејзината храброст и љубов кон играта. Покрај клубските настапи, таа игра и за училишниот тим на ООУ „Мирче Ацев“ во Ѓорче Петров.
Фудбалот за неа не е само игра – тоа е страст. Нејзин идол е Кристијано Роналдо, навива за Реал Мадрид, а со секој потег на теренот се гледа желбата да биде подобра, побрза и посигурна со топката.
Во спортско семејство, каде мајката е поранешна пингпонгарка, Калија сепак го избрала фудбалот – и засега, тоа е вистинскиот избор. Интересно, нејзиниот брат Дамјан кој има седум години е голман во истиот клуб, што дополнително ја зближува со спортот и тимската атмосфера.
Калија Зафировска е доказ дека талентот, желбата и љубовта кон фудбалот не познаваат граници. Ова е само почеток на една убава приказна – приказна која допрва ќе се пишува на фудбалските терени.
