Општина Лозово прави значаен чекор кон унапредување на спортската инфраструктура, откако доби вредна донација за стадионот на Фудбалската академија Работник Галактикос.
Станува збор за 300 столчиња обезбедени од ЈП Билјанини Извори од Охрид, со што значително се подобруваат условите на стадионот и се создаваат предуслови за поквалитетно следење на натпреварите.
Во реализацијата на оваа донација учествуваа повеќе чинители. Голема поддршка беше обезбедена од градоначалникот Бошко Цветковски, кој помогна во логистичкиот дел од процесот.
„Посебна благодарност до градоначалникот г-дин Бошко Цветковски за целосната логистичка поддршка во текот на процесот на преземање на столчињата. Голема благодарност упатуваме и до Кристал 1923 Велес и Слободан Цобе Јовановски за обезбедениот превоз на релација Охрид – Лозово. Исто така, благодарност до Ведран Ѓорѓиев и Дамјан Ѓорѓиев за помошта при истоварот. За крај, голема благодарност до нашите тренери Ѓоко Стојчевски и Антонио Китановски, без кои целиот процес немаше да се реализира“, велат од фудбалската академија Работник Галактикос.
Овој проект претставува почеток на една поширока визија за развој на фудбалот во Лозово, со амбиција во блиска иднина да се создадат услови за натпревари од детските лиги на Фудбалска федерација на Македонија, пред исполнети трибини и вистинска спортска атмосфера.
