Македонскиот одбојкарски шампион Штип УГД во среда (21 октомври) ќе го има својот дебитантски настап во Лигата на шампионите, најелитното клупско натпреварување во европската одбојка. Штипјани ги очекува сериозен предизвик на гостински терен, каде што ќе се соочат со холандскиот првак Орион Старс.
Натпреварот ќе се одигра во салата „SaZa Topsporthal“ во Дутинхем, со почеток во 20:00 часот. За македонскиот претставник ова ќе биде ново поглавје во клупската историја и можност да се претстави на највисокото европско ниво.
Екипата од Штип зад себе има исклучително успешен период. Минатата сезона, под водство на младиот стратег Кристијан Ристески, Штип УГД ја освои двојната круна, стигнувајќи до првата шампионска титула во клупската историја, а воедно го освои и Купот на Македонија третпат по ред.
Добриот ритам продолжи и во новата сезона, која штипјани ја започнаа на најдобар можен начин – со освојување на Суперкупот во Тетово. Со тоа, македонскиот шампион уште еднаш ги потврди своите амбиции и подготвеноста за нови предизвици.
Откако минатата сезона за првпат настапи на европската сцена, Штип УГД сега прави уште еден значаен чекор напред со дебито во Лигата на шампионите. Првиот противник ќе биде Орион Старс, холандскиот шампион, против кого штипјани ќе се обидат да остават добар впечаток и достојно да го претстават македонскиот клупски одбојкарски спорт.
За Штип УГД, ова е можност да го круниса успешниот период со настап на најголемата европска клупска сцена и да го започне новиот предизвик со амбиција за достојно претставување на Македонија.
