Екипата на Арсими стигна до минимална, но исклучително важна победа над Македонија Ѓорче Петров (0:1) во борбата за директен опстанок во Прва македонска фудбалска лига.
Херој на натпреварот беше Фатјон Јусуфи, кој го постигна единствениот погодок вреден три бода за тимот од Чегране.
По натпреварот, тренерот Вилдан Салиу во изјава за Спортска Мрежа потенцираше дека неговиот тим одиграл тежок и борбен натпревар, свесен за значењето на освоените бодови.
„Натпреварот беше многу тежок и борбен од самиот почеток. Знаевме колку се важни овие три бода за нас, особено во борбата за директен опстанок, и затоа влеговме максимално фокусирани и дисциплинирани. Противникот беше квалитетен и ни создаде проблеми во одредени моменти, но мислам дека моите играчи покажаа карактер, трпение и голема желба за победа“, изјави Вилдан Салиу за Спортска Мрежа.
Салиу дополнително нагласи дека оваа победа има големо значење за самодовербата на екипата, но и дека тимот мора да остане приземен во продолжението од сезоната.
„Не беше лесно да се дојде до победата, но тимот работеше напорно во текот на целиот натпревар и на крајот успеавме да ги освоиме многу важните три бода. Ова е значајна победа за нашата самодоверба, но мора да останеме мирни и концентрирани, бидејќи нè очекуваат уште тешки натпревари до крајот на сезоната“, дополни тренерот Салиу за Спортска Мрежа.
Со овој триумф, Арсими се искачи на седмата позиција со 32 освоени бодови, колку што има и Брера. Во следното коло, тимот ќе го пречека Пелистер на домашен терен во уште еден директен дуел од големо значење.
