Македонскиот одбојкарски шампион Штип УГД денес ќе дебитира во Лигата на шампиони, а прв предизвик ќе биде првакот на Холандија, Орион Старс.
Крушевскиот стратег кој го води македонскиот шампион вели дека пред нив е голем предизвик и историски момент, притоа рече дека ова е голема чест но и одговорност.
„Пред нас е голем предизвик и историски момент, не само за нашиот клуб, туку и за спортот во градот Штип. За првпат во историјата, еден штипски спортски колектив ќе настапи во најелитното европско клупско натпреварување – Лигата на шампионите. Ова претставува огромна чест и задоволство, но истовремено и голема одговорност за сите нас. Нашиот противник, Орион Старс од Холандија, е квалитетна и добро организирана екипа, која доаѓа од земја со богата одбојкарска традиција. Во својот состав има холандски, словенечки, белгиски и полски одбојкари, меѓу кои и играчи со големо репрезентативно искуство. Свесни сме за квалитетот на противникот и за предизвикот што не очекува, особено поради фактот што настапуваме на гостински терен. Сепак, верувам дека ова е одлична можност да го покажеме нашиот потенцијал, квалитет и сето она на што работевме во изминатиот период. За нас ова е ново и драгоцено искуство, но и значаен чекор напред во развојот и афирмацијата на клубот. Нашата цел е да одиграме максимално ангажирано, дисциплинирано и борбено, со сериозен пристап и желба достојно да се претставиме на европската сцена. Верувам во моите играчи и очекувам да го дадат својот максимум, без разлика на квалитетот и искуството на противникот. Горди сме што имаме можност да бидеме дел од едно вакво престижно натпреварување и да ги претставуваме нашиот клуб, градот Штип и македонската одбојка. Искрено се надевам дека овој историски настап ќе биде почеток на една успешна европска приказна, но и дополнителен мотив и поттик за развојот на одбојката и спортот во нашиот град“, вели тренерот на Штип УГД, Кристиан Ристески.
Натпреварот меѓу Орион Старс и Штип УГД се игра денес во во „Топспортхал“ во Дутинхем од 20 часот.
