Екипата на Чаир 2030 на убедлив начин го отвори плеј-аут сегментот во „МТЕЛ“ Супер лигата, откако на домашен терен во салата „Шабан Трстена“ славеше против Ангели со 91:69.
Чаирчани уште од самиот старт ја оправдаа фаворитската улога и покажаа дека разликата во квалитет е значителна, особено ако се земе предвид дека беа на чекор до пласман во ТОП 6 фазата, додека противникот е на дното од табелата.
Домаќините подобро го отворија натпреварот и по првата четвртина поведоа со 22:15. Вториот период донесе поизедначена игра, но вистинската разлика беше направена по паузата. Во третата четвртина Чаир 2030 доминираше со 22:11 и создаде недостижна предност од 67:49, со што практично го реши победникот.
Одлична вечер имаше Тачи, кој беше прво име кај домаќините со 25 поени, седум асистенции и четири скока. Значаен придонес даде и Реџа со дабл-дабл учинок од 20 поени и 13 скока, надополнети со четири асистенции. Двоцифрени беа и Четмен со 15 поени (плус шест скока и три асистенции) и Билингсли со 12 поени и осум скока.
Кај гостите од Ангели, најрасположен беше Ренг со дабл-дабл од 16 поени и 12 скока. Стојаноски додаде 12 поени, додека Стефанов и Чучковиќ постигнаа по 10 поени, при што Чучковиќ запиша и осум скока, а Стефанов пет асистенции.
Со овој триумф, Чаир 2030 направи важен чекор кон остварување на главната цел – опстанок во елитното друштво.
