Македонскиот шампион МЗТ Скопје Аеродром го претрпе третиот пораз во групната фаза на ФИБА Еврокупот, откако на гостувањето во Германија загуби од Вурцбург со 87:73, во натпреварот од третото коло во групата „Е“.
Германскиот состав, предводен од македонскиот тренер Сашо Филиповски, до победата стигна благодарение на подобрата игра во второто полувреме. Првата четвртина мина во изедначена игра, со резултат 21:21, но Вурцбург во вториот период ја презеде контролата и на паузата замина со предност од 49:43.
Клучната разлика домашниот тим ја направи во третата четвртина, кога пред последните десет минути поведе со 68:57. „Металците“ не успеаја да се вратат во натпреварот, па Вурцбург рутински ја зачува предноста и славеше со конечни 87:73.
Во редовите на МЗТ Скопје, кој настапи без капитенот Дамјан Стојановски, најефикасен беше Фаракан со 14 поени, четири скока и една асистенција. Маслинко постигна 12 поени и забележа седум скока, додека Тадиќ и Николиќ средбата ја завршија со по 10 поени.
За македонскиот шампион ова е трет пораз во исто толку натпревари во групната фаза на ФИБА Еврокупот.
Следниот предизвик за МЗТ Скопје Аеродром е дуелот со кипарскиот АЕК Ларнака, кој е закажан за 27 октомври во Скопје.
