Започнува највозбудливиот дел од сезоната во МТЕЛ Супер лига, каде во наредните пет кола ќе се решава кои четири екипи ќе обезбедат место во плеј-офот и ќе се борат за шампионската титула.
По 22 одиграни кола, шампионатот е поделен на ТОП 6 и плеј-аут сегмент. Во горниот дел, шест екипи ќе водат жестока трка за полуфиналето, додека во долниот дел три најслабо пласирани ќе испаднат во понизок ранг.
На врвот на табелата се ТФТ и МЗТ Скопје Аеродром со идентичен скор (19-3), но ТФТ има мала, но значајна предност од еден бод. Токму таа разлика може да биде клучна во борбата за првата позиција.
Сигурен чекор кон плеј-офот има и Пелистер (14-8), кој има солидна предност пред конкурентите. Најинтересно ќе биде во трката за четвртото место, каде Маџари и Кожув стартуваат со идентичен ефект (12-10), додека Тиквеш Голден Игл (11-11) е веднаш зад нив и чека своја шанса.
Викендот носи сериозни предизвици – Маџари гостува кај Пелистер во Битола, додека Кожув ќе се соочи со шампионот МЗТ Скопје Аеродром во СЦ „Јане Сандански“. Во меѓувреме, лидерот ТФТ ќе ја брани првата позиција во дуелот против Тиквеш Голден Игл во салата „Лазар Лечиќ“.
Со само пет кола до крајот на овој сегмент, секој натпревар ќе има тежина на финале – а местата во плеј-офот се помалку и вредат повеќе од било кога.
