По одигрувањето на натпреварите од 6. коло во „Оролоџото“ од Шпаркасе Прва лига, се расчистија две важни дилеми – Патриот 2016 останува во елитата, додека Спорт тим се сели во понизок ранг.
Во директниот дуел за опстанок, Патриот 2016 славеше убедливо на гостувањето кај Спорт тим со 47:78 и со тоа стана недостижен за конкурентот. Делчевки одиграа одличен натпревар, особено во втората четвртина кога се одлепија на 39:22, а потоа во последниот период ја заверија победата.
Американката Скот повторно блескаше со 30 поени, осум скока и шест украдени топки, додека Крисвел додаде 21 поен. Ангеловска беше одлична во организацијата со дабл-дабл учинок (10 поени и 10 асистенции). Кај Спорт тим се истакна Митановска со 16 поени и дури 26 скока, додека Лукиќ и Динова додадоа по 14, односно 13 поени.
Во дербито на колото, Бадел 1862 го совлада Вардар со 62:59 и направи голем чекор кон третата позиција на табелата. Натпреварот беше изедначен во првото полувреме (32:31), а Вардар во третиот дел имаше и пет поени предност. Сепак, Бадел во последната четвртина направи пресврт и стигна до важен триумф.
Фримен беше лидер со 19 поени, Клири забележа дабл-дабл (14 поени и 12 скока), додека Чолакоска и Петрушевска додадоа значаен придонес. Кај Вардар, Николиќ запиша 21 поен и 10 скока, а Тасевска и Алексиќ имаа по 11 поени.
Претходно, шампионот славеше во дуелот меѓу Баскет Кам и МЗТ Бела Вода со 58:44, додека последниот натпревар од ова коло се игра во Крива Паланка, каде Пробаскет му гостува на домашниот состав.
Финишот од сезоната ветува возбудувања, но дел од картите веќе се откриени – борбата за позициите продолжува со уште поголем интензитет.
